PROVINCE OF CEBU- Mibutyag ang kampo ni kanhi Cebu Gov. Gwendolyn Garcia, nga kasong administratibo nalang nahibilin sa kasong gipasaka nga reklamo batok sa kanhi gobernadora ug matud pa misumiter nalang sila ug motion for reconsideration.
Giklaro ni Atty. Rory Jon Sepulveda, ang legal consultant ni kanhi Cebu Gov. Gwendolyn Garcia, nga dili tinoud ang mga pasangil batok sa kanhi gobernadora nga nagbutyag nga gipakabkab niini ang Manga river nga nahimutang sa dakbayan sa Talisay.
Gipasabut ni Sepulveda nga gibasura ang kasong criminal ni Garcia, gumikan kay matud pa ang gibasehan sa desisyon sa Ombudsman nga walay malisya ug tataw ang tumong sa Gobernadora nga walay quarrying nga nahitabo ug igo lang kini nagpahigayon ug desilting apan walay Environmental Certificate of Compliance ang nasumiter hinungdan nga kasong administratiba ang napasaka.
Gihimug-atan usab sa kampo ni Garcia, nga ang desisyon dili tungod sa bag-o nga Ombudsman, apan basi kini sa nahimong “unanimous” decision sa Special Panel of Investigator nga mismo si kanhi Ombudsman Samuel Martirez ang nagporma.
Dugang usab ni Sepulveda nga wala makasumiter ug ECC ang pagpadesilting ni Garcia gumikan kay panahon kadto sa emerhinsiya nga nagkinahanglan ang mga residente ug tubig.
Gikuwestiyon usab niini nga nganung kinahanglan pa ang ECC nga gawas sa emerhensiya, anaa ang Protected Area Management Board, Department of Environment and Natural Resources lakip na ang Metro Cebu Water District.
Nanghinaut usab nga klaruhon sa Ombudsman ang desisyon nga wala gayuy dautang intensiyon si Garcia ug papason ang kasong administratibo nga nagpabilin.
Plano usab nga susihon sa kampo ni Garcia nga aduna bay mga pasangil nga dili tinoud nga nagbase sa affidavit ni Moises Depareni, kay kung mapamatud-an nga dili tinoud, mopasaka usab sila ug counter case batok niini
