CEBU – Patay atol sa pag-ambush ang kanhi barangay kapitan sa Gen. Climaco (Malubog), dakbayan sa Toledo, Sugbo niadtong Domingo sa hapon, Oktubre 9, 2022.
Kung diin ang biktima nga si Antonio Yumol Canonigo sakay sa iyang motorsiklo nga gimaneho sa iyang higala ug tanod nga si Bern Benlot sa Barangay Bagakay, dihang kalit nga gipusil sa duha ka riding in tandem, ug naigo sa likod si Canonigo samakaduhang higayon.
Sumala sa Toledo City Police Station, ang mga saksi niingon nga si Benlot nakabawos sa iyang .45 nga pistola ug napusilan ang gunman sa paa.
Daling misibat ang mga mamumuno samtang si Canonigo daling gidala sa Toledo City Medical Hospital, apan gideklarar kini nga dead on arrival.
Lakip sa narekober sa crime scene ang 10 ka kabhang sa .45 nga pistola.
Padayun pa nga gisusi sa kapolisan ang motibo sa pag-atake.
Nasayran nga niadtong Septembre 2017, gidakop sa mga operatiba sa Regional Intelligence Division-Regional Special Operations Group si Canonigo sa iyang establisemento sa negosyo sa Barangay Cambang-ug, Toledo City tungod sa paghupot og mga armas nga walay lisensya.
