CEBU – Gibanhigan patay ang kanhi barangay kapitan sa Sta. Rita lungsod sa Asturias amihanan-kasadpang bahin sa Sugbo.
Patay diha-diha dayon ang biktima dihang gipusil kini sa duha ka indbidwal kinsang gasakay og motorsiklo sa national road sa Barangay New Bago sa naasoyng lungsod pasado ala 1 sa hapon adlawng Miyerkules.
Giila sa kapulisan ang biktima nga si Camelo Amamag-id Dacaldacal, 50 anyos minyo ug taga Riverside Sta. Rita sa maong lungsod.
Sa sketchy report nga gisumitir ni PMAJ Alden B. Zambrano, nasayran nga gikan sa ilang tindahan ang biktima sa Sitio Sangi, Barangay Tubigagmanok, Asturias dihang gisundan sa duha ka lalaki nga sakay sa Rusi nga motorsiklo samtang ang biktima nagmaneho sa multicab nga gipanag-iya sa pamilya.
Pag-abot sa Barangay New Bago, gituparan sa mga suspek ang biktima ug dayong pusil.
Padayon pa nga nagpahigayon og follow-up operation ang kapulisan sa Asturias aron mailhan ang mga suspetsado ug masuta ang motibo sa pagpatay.
