Nakuhaan sa Kanlaon Volcano Observatory – Canlaon City (KVO-CC) IP Camera ang ash plume gikan sa Kanlaon Volcano sa Negros diin nagsugod alas 6:47 hangtod sa alas 7:17 sa buntag, karong adlawa Oktubre 12.
Matod sa PHIVOLCS, ang “grayish plume” niabot sa gitas-on nga 300 metros una pa naanod sa habagatan-sidlakan.
Sa pagkakaron, padayon ang monitoring sa buhatan sa bulkan diin nagkanayon nga tulo ka volcanic earthquakes ang natala niadtong Sabado.
Dugang pa niini nga adunay kinatibuk-ang 2,968 ka tonelada nga sulfur dioxide ang gipagawas kagahapon, nga labaw pa sa gipagawas niadtong Biyernes nga adunay 1,238 ka tonelada.
Nagpabiling alert level 2 ang status ug gidili gihapon sa ahensya ang pagsulod sa four-kilometer radius, o ang permanente nga danger zone, ingon man ang pagpalupad sa bisan unsang eroplano duol sa bulkan dili usab gitugotan.
Gipahinumdoman usab niini ang kasikbit nga mga komunidad nga posibleng mahitabo ang mga peligro sama sa kalit nga pag-alisngaw o phreatic eruption ug precursor magmatic activity.
