Nagpabilin nga stranded ang kapin sa 5,600 ka mga tripulanteng Pilipino sakay sa gatusan ka mga komersyal ug cruise vessel sa Persian Gulf ug Gulf of Oman.
Kini tungod sa maritime traffic sa kadagatan dungan sa nagkagrabe nga tensyon tali sa US, Israel, ug Iran duol sa Strait of Hormuz.
Sa usa ka pahayag, gipadayag sa Department of Migrant Workers (DMW) nga ang mga Pilipino lakip sa gibanabanang 20,000 ka international seafarers nga naapektuhan sa maong krisis sa seguridad.
Sumala sa ahensya, malampuson na silang naka-evacuate og kapin 1,100 ka mga Pilipinong tripulante pinaagi sa pakig-alayon sa mga tag-iya sa barko.
Padayon usab nga gimonitor sa DMW ang kahimtang sa mga nabilin aron masiguro nga aduna silay igong suplay sa pagkaon, tubig, ug tambal.
Gimandoan na ang mga lisensyadong manning agencies nga maghatag og regular nga update sa gobyerno.
Bisan pa man sa mga paningkamot nga mapadali ang repatriation, pipila ka mga tag-iya sa barko ang nagpanuko pa sa pagpagawas sa ilang mga tripulante tungod sa kabalaka nga makuwangan sila sa tawo samtang anaa sa tunga sa dagat.
