Mo-bid og 10,000 ka vials sa mga anti-rabies vaccines ang kagamhanang probinsya sa Sugbo nga nagkantidad og P18 milyones sa umaabot adlawng Lunes, Agosto 11, nga labing unang procurement nga ipahigayun pinagi sa-livestream ubos sa bag-ong transparency policy.
Gibutyag ni Provincial Administrator Ace Durano, nga ang pagpalit sa anti-rabies maoy labing unang major procurement nga gihimo ubos sa administrasyon ni Gobernador Baricuatro sukad siya milingkod sa katungdanan.
Matod niini nga ang pag-abli sa mga bids gikatakda sa Agosto 11, ug nasayran nga 11 ka mga suppliers ang misalmot sa pre-bidding conference, kini human nga nasayran ni Gov. Pamela Baricuatro sa mga kawani sa tambalanan nga hingpit na nga mahurot ang ilang suplay sa anti-rabies.
Ipang apud-apod ang mga bakuna base sa panginahanglanon sa mga tambalanan, ug libre kini nga makuha sa mga katawhan samtang target usab sa kapitolyo nga mahatud kini sa dili matapos ang buwan sa Agosto.
Ipatuman ang livestreamed bidding ubos sa Executive Order No. 37, nga gipirmahan ni Baricuatro niadtong Hulyo 28 aron pagmando sa real-time broadcasts sa tanang competitive procurement activities nga gidumala sa Bids and Awards Committees sa Kapitolyo.
Matod ni Durano nga gikinahanglan na ang livestreaming ubos sa Republic Act 12009 o ang New Government Procurement Act, apan ang executive order nagsiguro sa aktibong pagpatuman sa Sugbo.
Dugang usab niini nga ang lakang nagtumong sa paglikay sa overpricing, panagkunsabo, ug manipulasyon sa proseso sa bidding, aron nga mosalig ang katawhan sa tanang government transactions. | via Bombo Nathaniel Sandoval
