Napugos sa pagbakwit ang kapin sa 20,000 ka mga tawo tungod dakong sunog sa kalasangan sa British Columbia, Canada.
Ang Bald Range wildfire paspas nga mikaylap ug mi-abo na sa kapin 9,500 ka ektaryang kalasangan hinungdan nga gipagawas ang evacuation order sa Summerland Peachland ug uban pang mga distrito sa kasadpang bahin sa Okanagan Lake.
Gideklarar usab ni British Columbia Premier David Eby ang state of emergency human nga kapin 100 pa ka mga wildfires ang nagdilaab sa tibuok probinsya kondiin hapit katunga niini ang wala pa makontrol tungod sa init ug kusog nga hangin, dugang pa sa dugay nang hulaw.
Ang tibuok komunidad sa Summerland, nga adunay mga 12,000 ka mga residente, gimandoang mobakwit tibuok gabii apil na ang 8,000 ka mga tawo sa Peachland ug sa palibot niini. Wala pa matino sa mga opisyal kung pila ka balay ang nangasunog o naguba.
Matod ni Eby, adunay mga residente nga na-trap ug kinahanglan pang luwason, samtang nagpadayon ang mga search-and-rescue team sa pagsusi sa mga lugar nga nahimutang luyo sa linya sa sunog aron masiguro nga walay mga tawo nga natanggong.
