Kapin sa 200 ka mga tawo ang namatay human nahugno ang usa ka minahan sa Rubaya, silangang Demokratikong Republika sa Congo, matod sa mga awtoridad sa mga rebelde sa rehiyon.
Si Lumumba Kambere Muyisa, usa ka tigpamaba sa rebeldeng gobernador sa North Kivu, miingon nga ang minahan nahugno niadtong Miyerkules tungod sa kusog nga ulan.
Ang mga namatay naglakip sa mga babaye, mga bata ug mga artisanal nga minero nga nagmina og coltan, usa ka mineral nga gigamit sa paghimo og mga elektronik nga aparato sama sa mga smartphone ug mga kompyuter.
Usa ka kanhing superbisor sa minahan miingon nga ang lugar dili maayo ang pagmentinar, nga nakapadali sa aksidente ug nakababag sa mga paningkamot sa pagluwas.
Dugang niya nga ang mahuyang nga yuta sa lugar nakapasamot sa sitwasyon.
Gibanabana nga 20 ka mga nakaluwas ang gitambalan karon sa ospital.
Usa sa mga paryente sa mga biktima miingon nga sila nasubo pag-ayo, nga naghulagway sa mga biktima nga maisog ug kugihan nga mga tawo kansang panguna nga katuyoan mao ang pagsuporta sa ilang mga pamilya.
Si Gobernador Erasto Bahati Musanga, nga gitudlo sa mga rebelde sa M23, mibisita sa mga nakaluwas niadtong Biyernes. Ang M23 karon nagkontrol sa Rubaya ug mga bahin sa North Kivu, ug sumala sa mga internasyonal nga tigpaniid, sila gitabangan sa Rwanda.
Nasayran nga ang Rubaya usa sa mga lungsod sa North Kivu nga kontrolado sa M23, nga giingong adunay suporta gikan sa Rwanda.
Diin ang minahan dinhi naghupot og 15% sa global nga suplay sa coltan ug katunga sa kinatibuk-ang deposito sa DR Congo.
Ang Coltan importante alang sa paghimo og mga high-performance capacitor para sa lain-laing mga electronic device, mao nga kini taas og panginahanglan sa tibuok kalibutan.
Sukad sa 2024, ang mga rebeldeng M23 ang nagkontrol sa mga minahan, ug ang United Nations nag-akusar kanila nga nagpahamtang og mga buhis sa pagmina alang sa ilang kaugalingong kaayohan.
