Andam na ang kapulisan sa Cebu City Police Office (CCPO) sa paghatag ug hugot nga seguridad sa pagbisita ni President Ferdinand Marcos, Jr. karung adlawa dinhi sa dakbayan sa Sugbo alang sa groundbreaking ceremony sa Cebu Bus Rapid Transit.
Gipahibalo ni Cebu City Police Office Director, Police Colonel Ireneo Dalogdog, nga mukabat sa kapin 700 ka mga pulis gikan sa CCPO ang ipakatap gikan sa rota nga agi-an sa convoy paingon na sa mga ‘places of engagement’ sa presidente, lakip na sa South Road Properties.
Gawas sa kapulisan sa CCPO, matud ni Colonel Dalogdog nga adunay augmentation usab gikan sa Regional Mobile Force Battalion (RMFB-7), ingon man ang Task Force Kasaligan ug uban pang mga force multipliers.
Duha ka oras sa dili pa maabot si President Marcos, Jr. sa venue kay magpahigayon usab ug inspeksyon ang K9 units arun sa pagsiguro nga walay mga explosive devices nga gipang-montar.
Gipahibalo usab niini nga na-identify usab nila ang unom ka mga building sa palibot sa Fuente Osmeña diin gisusi na usab kini sa mga team sa Presidential Security Group (PSG) ug mimando nga sa matag floor sa maong mga edipisyo kay butangan ug mga police personnel arun nga masiguro nga walay mga sniper o bisan kinsa nga mga lawless elements nga adunay dautan nga plano ngadto sa presidente.
Samtang, gidugang sa naasoy nga police official nga human sa kalihokan sa Fuente Osmeña kay mupaingon na usab si President Marcos, Jr. sa SRP kung diin ipahigayon usab ang groundbreaking ceremony sa Socialize Housing Project and Development for the Urban Poor, kansang proyekto sa lokal nga kagamhanan sa dakbayan sa Sugbo subay sa katuyoan nga Singapore-like Cebu City.
