Gisugyot ni Gobernador Pamela Baricuatro nga mohatag ang Kagamhanan sa Lalawigan sa Sugbo og tabang-pinansyal nga moabot sa P1 milyon alang sa mga grupo nga mosalmot sa giplano nga “Festival of Festivals” aron makatabang sa ilang mga gasto sa preparasyon.
Kining maong hinabang apil sa plano sa Kapitolyo nga maghimo og mas simple nga cultural show, nga maoy gitan-aw nga puli sa Pasigarbo sa Sugbo sa miaging administrasyon. Matud ni Baricuatro, gilauman nga 15 ka lungsod ug siyudad sa Sugbo ang mosalmot, diin ang matag grupo adunay 60 ngadto sa 100 ka mananayaw.
Ubos sa maong sugyot, ang matag mosalmot nga grupo makadawat og P1 milyon, samtang ang mga gikan sa Isla sa Bantayan ug Camotes mamahimong makadawat og hangtod P1.5 milyon tungod sa dugang gasto sa plete sa barko.
Gipasabot sa gobernador nga ang kadaghanan sa mga mosalmot nakasayaw na sa ilang kaugalingong mga pista kaniadtong miaging mga bulan, hinungdan nga dili na kaayo dako ang preparasyon.
Gisaysay ni Baricuatro nga anaa na sa mga grupo ang mga kagamitan ug ang maong pasundayag, ug ang maong festival mogamit lang og banabana nga P20 milyones nga pondo, mas ubos kaayo komparar sa Pasigarbo sa Sugbo sa una nga kasagaran mogasto og dili momenos sa P200 milyones.
Una nang gi-justify ni Baricuatro nga ang iyang pagsaway sa dako nga gasto sa Pasigarbo wala nagpasabot nga kontra siya sa kultura ug talento sa mga Sugboanon. Iyang gipasalig nga kining bag-ong festival magpabilin gihapon nga dalan aron ikapakita sa mga lungsod ang ilang abilidad ug tradisyon ngadto sa publiko.
