Nihimo na og imbestigasyon ang Mandaue City Police Office (MCPO) sa sunodsunod nga pagpangawat sa manhole cover sa pipila ka barangay sa dakbayan.
Ang deputy city director for operations ug spokesperson sa MCPO nga si Police Lieutenant Colonel Franc Rudolf Oriol, niingon nga human masayri ang mga insidente sa pagpanulis, ang ilang director nga si Police Colonel Jeffrey Caballes nagpatawag dayon og tigom aron tukion ang maong butang ug mahatagan og interbensyon.
Matod ni Oriol nga ang buhatan ilabina, station 2 sa Barangay Subangdaku ug station 4 sa Barangay Casuntingan anaa na usab sa proseso sa pag-ila sa mga sad-an.
Labing minos napulo ka steel covers ang gikawat sa lain-laing barangay sa dakbayan, matod niya.
Matod ni Oriol nga nagduda sila nga ang mga pagpanulis gihimo sa usa ka grupo nga gikonsiderar nga ang matag regular nga gidak-on sa manhole cover adunay gibug-aton nga 20 hangtod 25 kilos.
Dugang pa ni Oriol nga ilang gitan-aw ang mga junkshop sa mga silingang lungsod ug siyudad.
