CEBU – Nihangyo ang labing taas nga opisyal sa Regional Mobile Force Battalion sa Central Visayas (RMFB-7) sa mga tag-iya og loose firearms nga itugyan dayon kini sa ilang buhatan.
Kini ang pamahayag ni Police Lieutenant Colonel Ronan Claravall, force commander sa RMFB-7, nga ang mga tawo nga madakpan tungod sa paghupot og loose firearms dakpon ug pasakaan ug tukmang kaso.
Matud ni Claravall nga sukad niadtong Agosto 2022, ila nang gikustodiya ang 93 ka loose firearms nga nakumpiska atol sa police operations o ni-surrender sa ilang lain-laing mga Maneuvers Company sa Central Visayas.
Ang mga loose firearms nga anaa karon sa ilang kustodiya naglakip sa siyam ka improvised shotgun, 54 ka piraso sa .38 revolver, duha ka .9mm revolver, napulo ka piraso sa .22 revolver; unom ka .45 pistola, napulo ka 5.56 revolver; usa ka improvised caliber 5.56 ug usa ka improvised rifle cal. 7.62.
Digang pa, nga ilang ipadayon ang pagpatuman sa “Oplan Katok,” usa ka programa sa Philippine National Police (PNP) diin ilang ipahigayon ang balay-balay nga pagbisita sa mga indibidwal nga gidudahang nanag-iya og loose firearms.
Makig-alayon usab sila sa local government unit ug maghimo og mga programa nga makatabang niadtong nipili sa pagtugyan sa ilang loose firearms.
