CEBU – Gisubay na sa kapulisan sa San Fernando Police Station ang suspek sa pagtulis patay sa usa ka 67-anyos nga byuda.
Sa pakighinabi sa Bombo News Team kang Police Senior Master Sergeant (PSMS) Herbert Pananganan sa naasoy nga police station, gipahibalo niini nga nagpadayon karun ang ilahang hot pursuit operation human nga adunay nakatudlo sa ‘identity’ ug sa nahimutangan sa suspek.
Matud pa, adunay mibarug isip witness sa nahitabong krimen.
Gidugang pa ni PSMS. Pananganan nga basi sa ilahang nakuha nga impormasyon, giingong nagpa-utang ug kwarta ang biktima, hayan dako ang posibilidad nga gitulis kini sa suspek ug dayun gipatay.
Gani, mismo ang suspek ang aduna pa’y utang sa biktima.
Gihulagway sa pulis nga linu-og gayud ang maong krimen gumikan kay diriyot na nga maputol ang ulo sa biktima gumikan kay gamay na lang nga panit ang naghupot sa li-og niini.
Kahinumdoman nga usa ka Diomedesa Lapera Gedaro, ang nakaplagan nang walay kinabuhi sa usa ka kalibonan sa Barangay Green Hills, San Fernando, Cebu pasado alas 11 sa udto kagahapon diin gituohan nga gi-gulgol ang li-og hinungdan sa iyahang kamatayon.///
