CEBU CITY-Nipadayag ang Cebu City Police Office (CCPO) og kaandam nga motabang sa kagamhanan sa dakbayan sa pagpalambo sa koleksyon sa buhis aron makab-ot ang ilang target nga P50 bilyones karong tuiga.
Atol sa paglusad sa “Sayaw Para sa Buhis” nga programa sa kagamhanan sa dakbayan sa Sugbo niadtong Huwebes, Hunyo 22, ang Treasurer’s office nihangyo sa tanang ahensya sa gobiyerno lakip na sa kapolisan, nga tabangan sila sa ilang tinguha nga makabayad ang tanan sa ilang buhis sa dakbayan.
Matod ni CCPO Chief Colonel Ireneo Dalogdog nga ilang suportahan ang maong programa sanglit alang man kini sa kalambuan sa dakbayan.
Mahimong partisipasyon sa kapulisan mao ang paggukod sa mga tax evader ug pasakaan silag kaso kon gikinahanglan.
Hatagan usab nila og seguridad ang mga maniningil og buhis nga mobisita sa mga establisemento sa negosyo nga padayong nagdumili sa pagbayad sa ilang bayronon sa siyudad.
Gipakusog sa kagamhanan sa dakbayan ang programa sa pagpangolekta og buhis, pinaagi sa “Sayaw para sa Buhis”, sanglit dinhi man sila makakuha og pundo alang sa ilang nagkadaiyang mga proyekto.
