CEBU CITY- Gipirmahan na ang Memorandum of Agreement (MOA) kabahin sa mas hugtan pa nga public order and safety sa dakbayan sa Sugbo sa Executive Building sa Cebu City Hall niadtong Disyembre 11, 2024.
Diin lakip sa mga nipirma mao sila si Cebu City Mayor Raymond Garcia, P/Col. Antonietto Cañete, City Director sa Cebu City Police Office ug Association of Barangay Councils President Franklyn Ong diin gisaksihan sa mga nagkalainlaing mga ahensiya sa gobyerno sama sa Bureau of Fire Protection, Bureau of Jail Management and Penology, Department of Justice, Department of Interior and Local Government-Cebu City, Cebu City Prosecutors Office ug Armed Forces of the Philippines-Visayas Command.
Ang Cebu City Public Order and Safety Agreement kay nagtumong sa pormal ug pagpalambo sa kolaborasyon sa mga tigpatuman sa balaod ug aron masiguro ang kaluwasan sa publiko, mamentinar ang kalinaw, ug atubangon ang nagkalain-laing hagit sa seguridad sa siyudad.
Pinaagi sa pag-align sa mga kahinguhaan ug mga estratehiya niining mga importanteng entidad, ang panag-uban nagtinguha sa pagpalambo sa mga tubag sa krimen, pagdumala sa trapiko nga mas epektibo, ug pag-andam alang sa mga katalagman.
Gani, mao kini ang unang higayon nga adunay nahitabong pinirmahay alang sa naasoy nga kasabutan sa dakbayan, ilawom usab sa pagdumala ni Konsehal Pastor “Jun” Alcover, Jr. ug inabagan sa Philippine National Police, alang sa pagkuha sa kaakohan sa mga kapitan sa pagpatunhay sa kahapsay ug kalinaw sa dakbayan.
Gihatagan usab og gibug-aton ni Cañete nga dili lang ang kapulisan ang maoy magpatuman ug mopatunhay sa kahapsay ug kalinaw tungod kay kinahanglan molambigit ang tanan aron epektibo ang pagmintinar sa kaayuhan sa dakbayan.
