Gipahibalo ni Ombudsman Jesus Crispin ‘Boying’ Remulla nga hapit na silang mopasaka og kasong plunder batok kang kanhi House of Representatives Speaker Martin Romualdez.
Apan iyang giangkon nga aduna pa’y mga legal nga aspeto nga kinahanglang husayon ug tapuson sa dili pa pormal nga mapatuman ang maong plano.
Human ipaubos sa fact-finding, ang maong kaso isunod ngadto sa preliminary investigation sa Office of the Ombudsman subay sa proseso nga gilatid sa balaod.
Gipasabot ni Remulla nga ang katuyoan niini mao ang pagsiguro nga mapanalipdan ang katungod sa mga indibidwal nga lalakipan sa maong imbestigasyon.
Nasayran nga ang maong lakang may kalabutan gihapon sa giingong kalambigitan ni kanhi House Speaker Martin Romualdez sa mga proyekto sa gobyerno sa pagkontrol sa baha nga giingong puno sa anomaliya.
Gitudlo si Romualdez nga usa sa mga ‘mastermind’ sa korapsyon sa maong mga proyekto, busa lakip siya sa mga nag-unang gilauman nga mapasakaan og pormal nga sumbong.
Bisan pa man niini, wala pa’y gibutyag nga piho nga petsa si Ombudsman Remulla kon kanus-a opisyal nga iduso ang kasong plunder batok kang Leyte 1st District Rep. Martin Romualdez.
