Hinay-hinay nga mibalik si Kim Soo-hyun sa spotlight samtang gisugdan niya ang pagtukod pag-usab sa iyang karera human sa taas nga panahon nga wala sa mata sa publiko.
Sumala sa The Korea Times, ang ahensya ni Soo-hyun, ang Gold Medalist, bag-o lang nagpagawas og mga clip gikan sa iyang interview sa Indonesian broadcaster diin iyang gipamalandong ang pagkahimong usa ka aktor.
Matud niini nga ‘right choice’ niya ang pagpili nga mahimong actor.
Gipaambit usab ni Soo-hyun nga gusto niyang mobisita sa Bali ug gipakita sa mga tumatan-aw ang pipila sa mga personal nga butang nga iyang gidala sa iyang bag. Mas niwang usab siya kon itandi sa iyang nangaging mga pagpakita sa publiko ug nagpabiling malipayon sa tibuok conversation.
Nagtimaan sa iyang unang pagpakita sa telebisyon sukad sa iyang pagpahulay, giawit ni Soo-hyun ang “Dreaming” gikan sa soundtrack sa 2011 drama nga Dream High.
Ang kanta adunay espesyal nga lugar sa karera ni Kim tungod kay kini gipakita sa drama diin iyang gidala ang papel sa aspiring singer nga si Song Sam-dong, kansang panaw nakatabang sa pagtukod ni Kim isip usa sa mga nagsingabot nga bituon sa South Korea.
Ang mga komento sa aktor nakadani sa atensyon samtang nagpadayon siya sa mga kalihokan sa kalingawan human siya mibiya sa spotlight taliwala sa kontrobersiya nga naglibot sa iyang nangaging relasyon sa namatay nga aktres nga si Kim Sae-ron.
Gihunong niya ang iyang mga kalihokan niadtong Marso 2025 human migawas ang mga alegasyon bahin sa namatay nga aktres, lakip na ang mga pag-angkon nga sila nag-date sa dihang menor de edad pa siya.
Niadtong Hulyo, gi-abswelto sa pulisya sa South Korea ang aktor sa mga alegasyon nga iyang gilapas ang Child Welfare Act sa nasud, nga nag-ingon nga dili igo ang ebidensya aron mapamatud-an ang mga alegasyon.
