Gikabutyag ni Cebu City Councilor Harold Go nga ilahang gipabantayan pag-ayo ang nagkagrabeng sitwasyon sa Middle East, samtang nagpadayon ang pag-ampo alang sa kalinaw, kalig-on, ug proteksyon sa mga inosenteng kinabuhi.
Matod ni Go, bisan layo ang panagbangi sa atong nasud, ang ingon niini nga lebel sa gubat adunay tinuod nga epekto sa Sugbo ug sa tibuok Pilipinas.
Tungod kay daghang mga Sugboanon ang adunay kabanay nga nagtrabaho sa Middle East, gitaga-an og gibug-aton sa konsehal nga ang ilang kaluwasan mao ang nag-unang prayoridad. Andam ang iyang opisina nga motabang sa mga apektadong pamilya ug makig-alayon sa mga nasudnong ahensya kon gikinahanglan.
Sa aspeto sa ekonomiya, gipasidan-an ni Go nga ang dugay nga kawalay kalig-on sa rehiyon mahimong makaapekto sa mosunod:
-Presyo sa lana sa kalibutan nga mahimong mopasaka sa gasto sa gasolina ug pamasahe;
-Presyo sa mga batakang palaliton tungod sa “supply chain disruptions”;
-Remittance sa mga OFW kon adunay mahitabong displacement o repatriation.
Isip Chair sa Committee on Business and Trade, gipasalig ni Councilor Go nga padayon nilang bantayan ang posibleng epekto niini sa lokal nga negosyo, presyo sa gasolina, ug supply chains aron maseguro nga ang Sugbo magpabiling lig-on ug andam.
Gitapos ni Go ang iyang pahayag pinaagi sa pag-awhag sa pagkamabinantayon, panaghiusa, ug pag-ampo, dungan sa pag-ingon nga ang “kalinaw mas maayo kaysa gubat.”
