Gipaabot sa Department of Transportation (DOTr) nga masugdan na sa third quarter ang pagtukod sa P16-bilyones nga Cebu international port.
Ang operations and maintenance (O&M) sa pantalan gilantaw isip public-private partnership (PPP) nga proyekto.
Kini atol sa Asia Infrastructure Forum nga gipasiugdahan sa Infrastructure Asia, matod pa ni Transportation Undersecretary Timothy John Batan.
Ang proyekto nga tukoron sa 25 ka ektarya nga reclaimed area sa lungsod sa Consolacion sa Sugbo nga adunay duha ka dunggoanan nga makaakomodar og 2,000 TEU (twenty-foot equivalent unit) nga mga barko sa unahan ug sa katapusan 4,000 TEU nga mga barko.
Matod ni Batan nga ang proyekto nakaseguro sa endorsement sa Investment Coordination Committee (ICC)-Technical Board sayo ning semanaha.
Ang sunod nga lakang mao ang pagkuha sa mga pagtugot sa ICC-Cabinet Committee ug sa National Economic and Development Authority Board, nga gipangulohan sa Presidente.
Suno kay Batan, 2027 ang target nga matapos ang proyekto.
Samtang ang pagtukod sa pantalan pagapondohan sa usa ka pautang gikan sa Export Import Bank of Korea (KEXIM), siya miingon nga adunay oportunidad alang sa pribadong sektor sa O&M sa pantalan.
$172.64 milyones nga loan agreement ang gipirmahan sa Pilipinas ug KEXIM alang sa pagtukod sa bag-ong international container port sa Sugbo niadtong 2018.
Sa pagkakaron, usa ra ka pantalan ang nag-alagad sa mga foreign container traffic sa Sugbo.
Siya miingon nga ang gobyerno malaumon nga ang proyekto makamugna og interes gikan sa mga kompanya, tungod kay kini ang pinakadako nga oportunidad sa pantalan sa Pilipinas.
