Gipasabot ni Atty. Rameses Victorious Gatchalian Villagonzalo, ICC-Accredited Lawyer nga ang pagbasura sa Korte Suprema (SC) ang petisyon nga gisang-at sa magtutudlo nga si Barry Tayam nga nagtinguha nga ideklarar nga balido ang quorum sa 12 ka senador atol sa sesyon sa Senado niadtong Hunyo 3, 2026, dili gibasi sa merits, bisan paman natubag o wala ang panglataw sa quorum.
Atol sa eksklusibong pakighinabi sa Bombo Radyo Cebu kaniya, gidugang ni Villagonzalo nga sa iyahang panlantaw, “procedural aspect” kini gumikan kay gibutang sa maong dismissal nga si Tayam, wala kini makatukod og igong legal nga interes aron hagiton ang kaso sa Korte.
Apan kung sa iyahang kaugalingon “unpopular opinion,” bisan si kinsa basta citizen sa Pilipinas ug anaa sa legal nga pangidaron, aduna kini baruganan kon standing nga mo-kwestiyon kabahin niini, ilabi na kung botante kini.
Subay niini, hugot nga gibarugan ni Villagonzalo nga adunay saktong standing nga mokwestiyon kabahin niini, ilabi na kung ang tumong sa petisyon mao ang maresulbar ang isyu kabahin sa quorum.
Gani, miyagyag usab og usa ka hypothetical question si Villagonzalo nga “what if” kung si Retired Justice Carpio nga nisang-at sa maong petisyon sa Korte Suprema ug adunay susamang argumento, maka ingun ba ang Korte Suprema nga walay legal standing usab si Carpio?
Busa, alang kaniya, ang Korte Suprema, dili pa andam nga mohukom sa pangunang isyu sa quorum.
Kahinomdoman nga sa usa ka press release, ang SC Office of the Spokesperson miingon nga ang petisyon ni Tayam gibasura tungod sa kakulang sa legal nga baruganan, nga mihukom nga wala siya makatukod og igong legal nga interes aron hagiton ang kaso sa Korte.
