Niangkon na ang Kuwaiti national nga maoy nag-unang suspek sa pagpatay sa overseas Filipino worker nga si Dafnie Nacalaban.
Mao kini ang gikompirmar sa buahatan sa Department of Migrant Workers (DMW).
Matud ni DMW Sec. Hans Leo Cacdac nga adunay mga balidong taho nga nadawat sa ilang buhatan nga mitug-an ang maong prime suspect.
Sa pagkakaron, wala pay daghang detalye ang giluwat tungod kay gipaabot pa ang opisyal nga report.
Ug kasamtangang gikustodiya ang Kuwaiti national uban sa iyang asawa, amahan, ug manghod nga maoy mitago kaniya.
Samtang, ang kalihim niingon usab nga nagpaabot pa sila og aksyon kalabot sa sumbong sa suspek aron makab-ot ang hustisya sa namatay nga Pilipina nga trabahante.
Kahinumduman nga napalgan ang nadugta nga patayng lawas ni Dafnie sa tugkaran sa balay sa Kuwaiti national niadtong Disyembre 31, 2024 human ang suspek gi-turn over sa iyang kaugalingong igsuon.
