CEBU – Mas pakusgan pa sa National Bureau of Investigation (NBI) Mandaue District ang ilang paningkamot sa pagmonitor sa sexual exploitation ug human trafficking dinhi, ilabi na karon nga niluag na ang mga restriksyon sa mga dagkong lugar sa Sugbo.
Kini human gipaubos sa inquest proceedings ang tulo ka indibidwal, lakip ang usa ka barangay official niadtong Pebrero 28, upat ka adlaw human kini masikop tungod sa giingong kalapasan sa human trafficking sa dakbayan sa Mandaue.
Gipasakaan na usab kini og kasong qualified human trafficking.
Labing minus 20 ka mga babaye ang naluwas gikan sa giingong sexual exploitation atol sa operasyon batok sa duha ka massage parlor nga nahimutang sa dalan Hernan Cortes sa Barangay Subangdaku, dakbayan sa Mandaue.
Gihimo ang dungan nga operasyon niadtong Pebrero 24, 2022, uban sa koordinasyon sa mga sakop sa Department of Social Welfare and Development (DSWD).
Giklaro sa buhatan sa NBI nga sa duha ka operasyon nga gihimo walay mga menor de edad nga nalambigit.
Giila sa mga otoridad ang mga dinakpan nga sila si Jharine Sinica, kinsa nagsilbing cashier sa usa sa mga massage parlor; Joel Caparida, residente ug barangay konsehal sa Barangay Linao, dakbayan sa Talisay; ug Lexie Marie Vega, nga taga Mandaue ug cashier sa pikas massage parlor.
Nasayran nga si Caparida maoy in-charge sa paghatod sa mga biktima ngadto sa mga hotel nga ilang gihikay alang sa ilang mga kliyente.
