Subling gitay-og og bag-ong linog nga magnitude 5.5 ang Meiktila, Central Myanmar, gahapon sa buntag, sumala sa U.S. Geological Survey.
Matud pa nga ang miigong linog maoy usa sa labing kusog nga aftershocks human sa 7.7 magnitude nga linog nga natala sa nasud niadtong Marso 28, nga nakamugna og grabeng kadaot ug nakakalas og liboan ka kinabuhi, nga miabot og 3,649 ka mga tawo ang namatay ug kapin sa 5,000 ang naangol.
Sumala sa Myanmar Meteorological Department, ang bag-ong linog nahitabo sa lungsod sa Wundwin, duol ra sa Mandalay, Myanmar.
Ingon man nga walay report sa kaylap nga kadaot o dugang kaswalti sa bag-ong linog, apan daghang mga residente ang gipabakwit tungod sa kakusog sa linog.
Nabalaka usab ang United Nations nga ang krisis sa kahimsog ug ekonomiya sa Myanmar mosamot tungod sa kadaot nga gipahinabo sa mga aftershocks, taliwala sa nagpadayon nga civil war ug kapin sa 3 milyon nga mga tawo nga gikataho nga nawala.
Nahitabo ang linog sa unang adlaw sa Thingyan, ang tulo ka adlaw nga pagsaulog sa tradisyonal nga Bag-ong Tuig sa Myanmar, hinungdan nga ang mga selebrasyon karong tuiga gikansela tungod sa katalagman.
