CEBU CITY — Laing senior citizen ang napalgang patay human nitumaw ang laing sunog kagabii sa R. Landon Street, Brgy. San Antonio, dakbayan sa Sugbo.
Daling miresponde ang mga sakop sa Cebu City Fire Department human nakadawat og alarma sa takna nga alas-11:13 sa gabii ug giisa kini sa second alarm pagkalabay sa pipila ka minutos.
Daling gipawong sa kabumberuhan ang balay nga gipanag-iya ni Grace Go ug na-fire out kini sa takna nga alas-12:22 sa kaadlawon.
Matud ni Fire Officer 2 Fulbert Navarro sa Cebu City Fire Department nga upat ka mga pamilya ang apektado human nga naugdaw ang maong balay ug mokabat ngadto sa P10.9-million ang danyos niini.
Napalgang patay ang 69-anyos nga si Emma Cubillan human gikatahong natanggong sa nasunog nga balay.
Nagpakisayud pa ang Cebu City Fire Department ngadto sa mga tagtungod kung unsa man ang hinungdan sa maong katalagman. (gn)
