MANDAUE CITY-Nakabsan sa kinabuhi ang usa ka lalaki nga gidunggab sa katrabaho niini.
Nahitabo ang krimen sa Brgy. Casuntingan dakbayan sa Mandaue pasado alas 11 sa Sabado sa gabii, Setyembre 9.
Nasayran nga ang gidunggab nga biktima mao si Arrjau Romano, 27 anyos, nga taga Brgy. Mantayun, lungsod sa Barili.
Samtang, ang suspek mao si Anito Pantollano, 23 anyos, nga taga Brgy. Campangga, lungsod sa Barili.
Base sa imbestigasyon sa kapulisan sa Casuntingan Police Station sa Mandaue City Police Office, nag-inom ang duha ka lalaki sa ilahang gitrabahoang construction diin sila stay-in.
Gikatahong adunay nahitabo nga panaglalis diin nasuko ang suspetsado sa biktima, kini human gipangutana ang suspek kung unsa ang natabang sa fraternity niini sa kamatayon sa iyahang anak.
Wala nauyonan sa suspek ang mga gisulti sa biktima og mikuha kini og kutsilyo dayon gidunggab dughang bahin ang biktima hinungdan sa kamatayon niini.
Nasikop ang suspek nga padulong unta mo-ikyas sa ilaha sa lungsod sa Barili buntag sa Domingo, Setyembre 10, nunot sa gipahigayong hot pursuit sa kapulisan.
Sa kasamtangan nagtingkagol sa prisohan sa Casuntingan Police Station Male Custodial Facility ang suspetsado diin moatubang sa kasong pagpatay.
