Blangko pa ang motibo sa kamatayon sa usa ka lalaki sa Brgy. Fuente, sa lungsod sa Carmen, Cebu diin gipanitan ang ulo niini.
Kini human nga nakaplagan sa mga kapulisan ang patayng lawas sa biktimang si Edgardo Marco Corbo Jr., hingkod ang panuigon, ug residente sa Upper Tabogon, Mandaue City.
Matud ni Police Corporal Francisco Dumasig sa Carmen PNP nga mireport sa ilang buhatan ang usa ka mag-uuma kinsang unang nakakita sa maong patayng lawas.
Human miresponde ang kapulisan sa luna nga gipanag-iya sa concerned citizen, nakit-an nila nga wala nay nawong, mata, ug li-og ang biktima ug gihiktan og pisi ang mga kamot.
Apan walay residente ang misaysay sa nahitabo sa lalaki gumikan kay wala nakakita sa maong krimen.
Base sa saysay sa mga residente, nagsuroy-suroy ang biktimang si Corbo ug giingong adunay problema sa pangisip.
Pagkahuman sa pipila ka oras, midangop sa buhatan sa Carmen PNP ang kabanay sa biktima ug nag-positibo ang identity niini pinaagi sa uwat sa likod ug sa gibitbit nilang picture.
Dugang pa ni Dumasig nga na-missing ang si Corbo niadtong Enero 9 sa hapon.
Gikatakdang ipaubos sa autopsy ang patayng lawas sa biktima samtang gipangita pa ang responsable sa krimen ubos sa hot pursuit operation.
