CEBU CITY-Patay ang usa ka 55-anyos nga pasyente human giingong miambak gikan sa ikatulong andana sa Vicente Sotto Memorial Medical Center (VSMMC) pasado alas 10 sa buntag niadtong Huwebes, Abril 11, 2024.
Giila ang biktima nga si Godofredo Purisima Trocio, taga Sitio Kalubihan, Barangay Luray 2, dakbayan sa Toledo.
Matod sa asawa sa biktima nga si Laila AƱasco Trocio, 50, na-admit sa VSMMC ang iyang bana niadtong Abril 8, ug gikatakdang operahan sa pancreatic mass.
Matud pa sa asawa nga sa wala pa mahitabo ang insidente, namatikdan niya nga wala na mahimutang ang iyang bana nga gihulagway niyang hilomon nga daw adunay gikahadlokan.
Tungod niini, ila siyang gi-refer sa usa ka psychiatrist para sa evaluation.
Matud pa ni Laila nga samtang naghigda ang iyang bana nilakaw siya kadiyot paingon sa comfort room apan pagbalik niini wala na ang biktima.
Mitan-aw siya sa bintana ug nakita niya ang iyang asawa nga nagbuy-od sa yuta, nagkadugo.
Daling gidala ang biktima sa emergency room sa tambalanan, diin gideklara kining patay alas 10:46 sa buntag.
Nasayran nga 17 ka tuig na ang nakalabay, ang biktima misulay usab sa pagkutlo sa iyang kinabuhi pinaagi sa paglaslas sa iyang pulso gamit ang hait nga butang.
Tungod niini padayon pa ang imbestigasyon sa Abellana police station apan giklaro niini nga walay foul play sa kamatayon sa pasyente base sa impormasyon nga gihatag sa iyang asawa.