CEBU CITY — Natanggong sa prisuhan ang usa ka lalaki kinsang giingong nanghulga sa iyang kapuyo atol sa entrapment operation sa usa ka hotel sa Hernan Cortes St., sa dakbayan sa Mandaue.
Kini human nga misumbong ang biktimang si “Paula” (dili tinuod nga pangalan), 22 anyos sa buhatan sa Regional Anti Cyber Crime Unit (RACCU) -7.
Gisaysay ni Paula nga makigbuwag unta si Paula sa iyang kapuyo nga si alyas “Jorel,” 22 anyos gumikan kay walay klaro ang ilang relasyon.
Base sa imbestigasyon sa RACCU-7, mihulga si Jorel nga iyang ipakatap ang mga pictures ni Paula diin hubo ang iyang lawas kung dili kini makighilawas kaniya sa katapusang higayon.
Padung unta mo-check in ang dinakpan sa maong hotel apan nasikop kini dayon sa mga sakop sa RACCU-7.
Nasakmit sa otoridad ang usa ka cellphone ug 64 gigabyte nga USB diin anaa diha ang mga hulagway ni Paula.
Mag-atubang ang dinakpan og kasong kalapasan sa Cybercrime Prevention Law, Violence Against Women and Children Law, ug grave threat.
