CEBU CITY — Natanggong karon sa prisuhan ang usa ka 21-anyos nga lalaki sa Danao City, Cebu kinsang mipakatap og fake news mahitungod sa giingong puti nga van nga mangidnap og mga bata.
Kini human nga mipahigayon ang Danao City PNP ug Regional Anti-Cybercrime Unit (RACU)-7 og pag-serve sa warrant of arrest ngadto sa maong lalaki sa Brgy. Suba sa nahisgutang dakbayan.
Matud sa hepe sa Danao City PNP nga si Police Lieutenant Colonel Maribel Getigan nga nasikop ang maong lalaki pinasikad sa warrant of arrest nga naluwat sa Danao City RTC.
Kahinumdumang nagkaguliyang ang mga ginikanan human mikatap ang dili beripikadong balita kalabot na sa puting van nga nangidnap og mga bata niadtong Disyembre 2019.
Mag-atubang ang maong lalaki og kasong kalapasan sa RA 10175 o Cybercrime Prevention Act of 2012.
Mibahad si Getigan sa mga manghimo-ay og mga peke nga balita nga mabalhog gayud sa prisuhan, pinasubay sa istriktong pagpatuman sa balaud.
“The court has set a bail of P 60, 000.00 for his temporary liberty for violating PD 90 otherwise known as Declaring Unlawful Rumor-Mongering and Spreading False Information in relation to R.A. 10175 or the Cybercrime Prevention Act of 2012,” dason pa sa City Director.
