Dili ra pasakahan og kaso sa ginikanan sa duha ka bata nga gisulayag dagit sa usa ka “sabog” nga lalaki sa dakbayan sa Talisay niadtong adlaw sa Martes Hunyo 25, 2024.
Kini human nga nasusi nga wala ra naunsa ang panglawas ug ang emosyonal nga kahimsog sa maong mga bata sa ilang pag-uban sa maong “sabog” nga lalaki.
Kahinumduman nga naluwas sa mga sakop sa City of Talisay Traffic Operations and Development Authority (CT-TODA) ug usa ka nagpatrolyang polis ang sakyanan nga giingong gimaneho sa maong lalaki sakay ang gidanggit nga duha sa bata.
Sa pakighinabi sa Bombo-Newsteam kang Jonathan “Joy” Tumulak ang pangu sa City of Talisay Traffic Operations Development Authority (CT-TODA), gitino niini nga gipahunong ang sakyanan gumikan kay nasahiran niini ang usa ka sakyanan ug wala sila masayud nga aduna diay bata sa sulod niini.
Dihang nahitabo na ang interogasyon, nabantayan sa mga sakup sa CT-TODA nga balisa ang maong drayber ug dili makatubag ug tarung sa ilahang mga pangutana, ug ilahang nakita ang duha ka bata sa sulod sa iyahang sakyanan hinungdan nga gidala kini sa ilahang opisina para sa dugang mga pangutana.
Sa ilahang pakighinabi sa mga bata, ilahang nasayran nga dili nila amahan ang maong suspek, ug gipasakay lamang sila niini sa iyahang sakyanan ug giingnan nga magpabugnaw ra sa aircon niini.
Gidugang ni Tumulak nga pipila ka yugto ang milabay naabut ang amahan sa duha ka mga bata ug didtu nila nasayran nga ang awto nga gigamit sa suspek gipapintalan diay sa gi trabahoang shop sa ilahang amahan.
Nasayran usab nila nga sa paglakaw sa sakyanan gisundan kini sa amahan, gumikan kay nakita sa iyahang asawa(inahan sa mga bata) nga gisakay ang ilahang mga anak.
