CEBU – Gidonate ni Lapu-Lapu City Mayor Junard “Ahong” Chan ang iyang usa ka buwan nga suweldo sa mga nasunogan sa Sitio Paradise, Barangay Looc sa dakbayan sa Mandaue.
Gikatahong mikabat sa P188,726 ang tseke alang sa suweldo sa mayor.
Gawas sa usa ka buwan nga suweldo, gi-turnover usab ni Chan ngadto kang Mandaue City Mayor Jonas Cortes ang 1,000 pcs. relief packs nga naglangkob sa food and non-food items, sama sa mga gamit sa kusina ug mga hygiene kit.
Nidonar usab si Chan og mga family shelters diin mahimong temporaryong magpabilin ang mga biktima sa sunog sa mga evacuation center.
Misaad usab ang mayor nga modonar og P1 milyones apan matud pa kinahanglan pa kining mangayo og pagtugot sa konseho sa dakbayan.
Gikonsiderar na ni Chan nga igsuong dakbayan sa Lapu-Lapu ang Mandaue City busa way rason nga di kini motabang sa dakbayan niining panahon sa krisis nga kaniadto panahon sa Bagyong Odette usa man ang Mandaue sa nitabang usab sa mga Oponganon.
