Nagpadangat sa ilang pasalamat sa mga Sugbuanon ang grupong Pilar Youth Dance Company nga Sinulog 2026 contingent nga gikan sa Las Piñas City sa tabang nga gidalit kanila human sa taho nga naglisud kini makapauli human sa pagpasundayag niadtong Enero 18.
Sa eksklusibong pakighinabi sa Bombo Radyo Cebu News Team kang Mark Cañeza, ang Director sa Pilar Youth Dance Company nga dako ilang pasalamat sa mga Sugbuanon nga midalit kanila og pagkaon, tubig, kwarta ug uban pa aron masukagod ang adlaw sa dili pa sila mamauli sa Metro Manila.
Gani sumala pa niini nga dili dayon silang tanan makauli kay kapin katunga pa lang nila ang nakakuha og ticket sa barko ug ang laing katunga kay sa Enero 25 pa makabyahe pinaagi sa eroplano nga gi-book sa ilang mga opisyal gikan sa Las Piñas.
Giangkon sa grupo nga ang unang hinungdan sa lang pagpabilin diri sa Sugbo kay nahutdan sila og budget pangplete pauli busa himuon nila kini leksyon puhon nga mas hanas na mudumala sa ilang travel budget.
Ingon man nga gilauman gihapon sa grupo nga makasalmot pa kini sa mga musunod nga edisyon sa Sinulog tungod kay wala sila biyai sa mga Sugbuanon sa panaon nga sila nanginahanglan.
Samtang sa habig sa billeting area sa grupo nga mao ang Don Carlos Gothong National High School pinaagi ni Principal Nathaniel Flores nga dili unta matagam ang mga out-of-town contigents nga unta nakahiagum sila og leksyon sa panghitabo sa tinguha sa pagselebrar sa Sinulog sa Sugbo nga alegre ug mahinungdanon.
