Opisyal na nga gitapos sa kagamhanan sa Dakbayan sa Sugbo ang search and rescue operations sa nahugnong landfill sa Barangay Binaliw human sa napulo ka adlaw nga walay hunong nga operasyon.
Kini human naugkat ang katapusang missing person pasado alas 5:00 sa buntag gahapong adlawa, Dominggo, ug sumala ni Cebu City Councilor Dave Tumulak, ang chairman sa City Disaster Risk Reduction and Management Council, nakuha ang patayng lawas sa biktima sa alas 5:41 sa buntag.
Tungod niini, niabot na sa 36 ang kinatibuk-ang ihap sa mga nangamatay sa maong trahedya, samtang 18 usab ang nitala nga nangaangol.
Kahinumduman nga nahitabo ang pagdahili sa dakong pundok sa basura niadtong Enero 8, diin natabunan ang mga pasilidad ug pipila ka trabahante. Gigamitan og mga modernong ekipo ang maong operasyon aron maugkat ang tanang biktima taliwala sa delikado ug baho nga kahimtang sa dapit.
Samtang, gipahayag usab ni Mayor Nestor Archival nga magsugod na ang lawom nga imbestigasyon sa maong panghitabo ug tumong niini nga masuta kon kinsa ang angay manubag ug aron malikayan nga masubli pa ang susamang trahedya sa umaabot.
