CEBU CITY– “Laughter is the best medicine but if you laugh alone, you need a medicine”. Mao kini ang motto sa usa ka 72 anyos nga inahan kinsang dunay 9 ka buhing anak.
Gisaysay ni Estrelita Romo Mier sa tulumanong Kagahapon Pa Lang sa Bombo Radyo Cebu ang estorysa sa iyang kinabuhi. Kining maong ‘motto’ ang iya matud pang sumbanan aron nga malagpasan niya ang tanang hagit sa kalibutan.
Nasayran nga highschool graduate lamang si Mier nga anak sa matud pina-angkan. Tungod kay nakakaplag siya og gugma, wala na siya mu-eskwela pa og college inay nakingkamot kini sa pag-umol og pamilya.
Nakabaton ug 12 ka anak si Mier kung diin 2 niini ang nakuha ug 1 ang namatay. Tagsa ka tuig lang usab ang gap sa iyang mga anak butang nga lisod kaayo ilabina kung matud pa magdungan og kasakit. Gani ilado na si Mier sa City Hospital gumikan kay kanunay man masakit ang iyang mga anak.
Apan kining tanan matud pa ang iyang gikaya. Maninda siya og itlog, isda ug uban pa aron lang sila mabuhi. Samtang ang iyang bana, ang kusog usab mu-inom apan iya kining gisabot butang nga midugay usab ang ilang relasyon. Gihimug-atan ni Mier nga sa kaminyoon normal lang matud pa ang away ug problema. Sigon pa nga ‘away gani away lang, walay buwagay’.
Apang gumikan usab sa bisyo sa iyang bana nga kusog manigarilyo, mitaliwan kini. Taliwa sa mga pagsuway nga nasugatan ni Mier, wala niya tuguti nga lamyon siya sa problema inay iya kining gipakigbisogan. Matud pa niini nga kung maghilak lang siya sa suok, walay mutabang niya hayan mas maayo nga mulihok nalang para mabuhi.
Gani, usa usab sa sekreto nganu nga malipayon si Mier mao ang pagkakontento sa kung unsa ang naa niya karon. Kini tungod usab kay hugot ang iyang relasyon sa Ginoo ug alang kaniya, temporaryo lamang ang mga mahalong butang sa kalibutan.
Sa karon, nahiluna na usab ang iyang 9 ka anak ug bisan man matud pa dili maayo ang kahimtang niini, malipayon gihapon si Mier nga napadako niya ang iyang mga anak nga dunay maayong pamatasan.
Se edad nga 72 anyos, nagtrabaho gihapon si Mier tungod kay dili matud pa siya gusto magsalig sa iyang mga anak. Malipayon usab kini karon nagsud-ong sa iyang 20 ka mga apo.
