Gipaambit sa abogado ni kanhi Presidente Rodrigo Duterte nga wala na sila makurat sa mga ebidensiya nga gisumitir sa International Criminal Court (ICC) kalabot sa kaso batok sa kanhi presidente.
Matod ni Atty. Nicholas Kaufman, bisan og dili niya ibutyag ang reaksyon ni Duterte o ang estratehiya sa ilang kampo, ilang gisusi pag-ayo ang kapin sa 2,300 ka mga dokumento nga gisumiter sa prosekusyon niadtong Hulyo 1 hangtod 4, diin moabot ngadto sa 100 ka pages matag usa.
Dugang ni Kaufman nga ang ilang team gilangkuban sa siyam ka mga eksperto nga nagtutok sa pagpangandam alang sa pagkumpirmar sa pagdungog sa mga kaso sa Setyembre ning tuiga.
Samtang gitumbok usab ni Kaufman ang suporta sa pipila ka mga Pilipino sa panawagan nga pabalikon si Duterte sa nasud sama sa resolusyon ni Senador Alan Peter Cayetano alang sa house arrest, diin gihimug-atan sa abogado nga angayan lang nga husayon ang kanhi presidente ubos sa justice system sa Pilipinas.
Bahin usab sa panglawas ni Duterte, si Kaufman niingon nga anaa siya sa maayong kahimtang bisan pa sa iyang edad ug hapit upat ka buwan nga pagkapriso sa The Hague.
