Andam ang liboan ka mga fighters gikan sa grupo nga gipaluyohan sa Iran sa Middle East nga mopaingon sa Lebanon aron makig-uban sa militanteng Hezbollah sa pagpakig-away sa Israel kung adunay mahitabo nga all-out war.
Kini human mihulga ang mga opisyal sa Israel nga maglunsad og opensiba sa militar sa Lebanon kung wala’y katapusang negosasyon aron papahawaon ang Hezbollah sa utlanan.
Sa usa ka pakigpulong, ang lider sa Hezbollah nga si Hassan Nasrallah miingon nga ang mga militanteng lider gikan sa Iran, Iraq, Syria, Yemen ug uban pang mga nasud kay mitanyag nga magpadala og liboan ka mga manggugubat aron pagtabang sa Hezbollah apan siya miingon nga daghan sila og mga fighters diin anaa sa kapin 100,000.
Gipahibalo usab ni Nasrallah nga sa pagkakaron naggamit lamang sila sa usa ka bahin sa tibuok pwersa sa ilang grupo, ilabi na ang mga espesyalista nga fighters nga naglunsad og mga missile ug drone attack.
Hinuon matud niya nga mahimo kini kung mahitabo ang all-out war diin daan na niyang gipahayag ang posibilidad nga ang mga fighters sa nasangpit nga mga nasud mao’y ilang kaalyado kung adunay gubat.
Samtang, gikumpirmar sa Amerika nga mohatag kini og suporta sa Israel kung adunay mahitabo nga hingpit nga panagbangi tali sa duha, nga usa ka kaalyado ug mas kusgan kay sa Hamas.
