PROVINCE OF BOHOL- Naglusad usab sa ilang bersyon sa Libreng Sakay program ang dakbayan sa Tagbilaran sa probinsya sa Bohol isip pag-abag sa mga manakayay sa nagkataas sa presyo sa produktong petrolyo.
Ang inisyatiba kay nagdeploy og city buses kada adlaw diin mamahimo kining sakyan sa publiko ilabi na sa mga trabahante ug estudyante.
Nag-operate kini matag Lunes hangtod sa Sabado, diin adunay tulo ka coaster type vehicle ang mularga matag peak hours nga mao ang alas 6 hangtod sa alas 9 sa buntag ug alas 4 sa hapon hangtod sa alas 8 sa gabii.
Aduna kiniy tulo ka gitaganang routa nga mulatas sa Barangay Manga, Cabawan, ug Bool diin mamahimo musakay ang mga commuter sa designated drop-off ug pick-up points.
Sumala pa ni Tagbilaran City Mayor Jane Yap nga ang programa kay nakadesinyo isip hinadaling pagtubag sa krisis nga nasinati karon sa sektor sa transportasyon samtang gipalig-on ang access sa reliable nga masakyan sa ilang syudad.
