Gihulagway sa grupong Pagkakaisa ng mga Samahan ng Tsuper at Opereytor Nationwide (Piston) Cebu nga “dili patas” ang programa sa gobyerno nga Libreng Sakay diri sa Sugbo nga nagserbisyo sa routang “01K” (Mandaue – Urgello) kay matod pa pipila lang ang makapanghimulos niini.
Kini ang gipamahayag ni Greg Perez, ang pangu sa PISTON Cebu atol sa eksklusibong pakighinabi sa Bombo Radyo Cebu Newsteam nga matod pa maka benepisyo lang kini sa pipila ka mga commuters ug nagbilin sa mga drayber nga makuhaan sa ilang mga panginabuhian.
Kahinumduman nga gilusad sa Department of Transportation (DOTr) ang “Libreng Sakay” program niadtong Miyerkules, Hulyo 23, diin ang mga modern public utility vehicles (MPUVs) ang nagserbisyo sa routa nga adunay bana-bana nga makahatod og 20,000 ka mga pasahero kada adlaw.
Gani mismong si Transportation Secretary Vince Dizon pa ang nangulo sa pag-abli sa programa nga magserbisyo lang sa mga oras sa alas 6 hangtod alas 9 sa buntag ug alas 5 sa hapon hangtod alas 8 sa gabii kada adlaw gawas sa Sabado, Dominggo, ug holidays.
Gitagana ang budget sa programa sa P150-160 milyones isip pilot study sa Sugbo ug Davao City.
