CEBU CITY-Mipahigayon og rally ang mga aktibista atubangan sa Police Regional Office 7 ingon man sa kadalanan sa Osmeña Boulevard paingon sa dalan sa Colon diin gipangulohan sa Bagong Alyansa Makabayan o kon BAYAN Central Visayas kauban ang ubang sektor nga gipanalipdan ang tawhanong katungod lakip ang mga organisasyon sa ilalom sa kilosang magbubukid sa Pilipinas.
Human sa 75 ka tuig sukad nga giduso ug mipirma ang Pilipinas sa Universal Declaration of Human Rights, anaa sa gihapon ang mga kalapasan sa tawhunong katungod.
Sa pakighinabi sa Bombo Radyo Cebu News Team ngadto kang Jaime Paglinawan, ang Chairman sa Bagong Alyansang Makabayan Central Visayas nga kusganong gibarugan niini nga wala gihapon nasayod ang mga kadagkoan sa gobyerno kon unsa ang tinuod nga tawhunong katungod.
Gani, usa sa ilang gisinggit ang obligasyon sa gobyerno nga mohatag og trabaho ug dili relocation, ingon man nga dili i-red tag.
Sa pikas bahin, padayon ang ilang pagpadangat sa ilahang mga panghinaot nga ma-alibyuhan sama sa tinuod ra reporma sa yuta, suhulan, regularisasyon, ug uban pa.
