CEBU CITY — Patay ang usa ka bedridden nga senior citizen samtang duha ang naangol human niulbo ang sunog kagbii sa F. Llamas St. Brgy. Punta Princesa, dakbayan sa Sugbo.
Giila sa mga otoridad gikan sa Cebu City Fire Department ang biktimang si Cesar Cazar, 70-anyos, ug nagpuyo sa nahisgutang dapit.
Matud sa imbestigador nga si Fire Officer 2 Emersen Arceo nga nag-inusara si Cazar sa ikaduhang andana sa panimalay sa dihang gilamoy kini sa dakong ka’yo.
Samtang nagpaalim pa karon ang mga naangol nga silang Gerald Tzu, 27-anyos; ug Arnold Cabudsan, 36-anyos human nakaangkon og mga paso sa lawas.
Gilamoy sa dakong ka’yo ang walo ka istraktura samtang usa ang partially burned diin gibana-banang mokabat sa P800,000 ang danyos niini.
Nigawas sa inisyal nga imbestigasyon nga nibuto ang usa ka LPG Tank nga nahimutang duol sa usa ka inilang palitanan og lechong manok.
Nakigkumbati ang mga kabumberuhan sa maong sunog diin milanat kini og kapin usa ka oras ug giisa kini sa second alarm. (report by Bombo Joann Gantalao/ekp/gn)
