Gipahibaw sa Land Transportation Franchising and Regulatory Board – Central Visayas (LTFRB-7) nga muhatag sila og dugang fuel subsidy ngadto sa mga operator sa mga pampublikong sakyanan sa rehiyon nga naapektuhan sa pagsaka sa presyo sa gasolina.
Kini ang gipamahayag ni Abosamen Matuan, ang Regional Director sa LTFRB-7 sa pakighinabi niini sa Bombo Radyo Cebu News Team diin gikabutyag sa opisyal nga adunay 37,744 ka mga benepisyaryo sa Central Visayas ang mahatagan sa fuel subsidy allocation.
Apan giklaro niini nga wala pay insaktong numero kung pila ang ihatag nga fuel subsidy kay naghuwat pa sila og mando gikan sa LTFRB Central Office.
Gani sa hisgutanang pagpasaka sa pletehan kay nalatid kini sa nakalabayng semana nga kung mulapas sa P60 matag litro ang presyo sa krudo kay ang ilang ahensya mag-propose sa provisional fare increase. Apan magpaabot gihapon kini sila sa instruksyon gikan sa Central Office.
Gihinaot ni Matuan nga matapos na ang panagbangi sa Middle East nga nakapahinabo og krisis sa suplay sa produktong petrolyo.
