Makig-alayon ang buhatan sa Land Transportation Office Region 7 (LTO-7) ngadto sa mga sakop sa Philippine National Police (PNP) sa Rehiyon-7, kabahin sa pag deploy sa mga breath analyzer units aron sa paggamit sa paggukod sa mga hubog nga magmaneho ug sakyanan sa kadalanan.
Kini ang gikabutyag ni Francisco “Franz” Ranches Jr, Officer in charge sa Land Transportation Office 7, atol sa eksklusibong pakighinabi sa Bombo Radyo Cebu News Team, diin siya midasun nga nagkinahanglan pa og accreditation ug calibration ang mga breath analyzer aron kini magamit sa pagsuta sa lebel sa alcohol sa lawas busa, usa sa ilang giplano mao ang pagpahigayon ug deuputation training sa mga sakop sa kapulisan aron makagamit sa mao nga ekipo apil na niini ang paghatag og Deputation ID sa mga officers aron walay mamahimong isyu sa pagpahigayon og breath analyzer tests sa mga kaso maglambigit og driving while under influence of liquor.
Sumala pa ni Ranches, adunay 12 ka units sa Breath analyzers ang LTO-7 niining tungura, ug andam kini nga ipagamit ngadto sa kapulisan aron sa strikto nga pagpatuman sa Anti Drunk and Drugged Driving Act of 2013.
Ingun man nga nagtumong usab kini aron maminusan ang mga motorista nga mag-drive nga hubog sa kadalanan.
Dugang pa ni Ranches, karong semanaha gikatakda nga mohatag ang LTO-7 og mga breath analyzers ngadto sa Cebu Police Provincial Office (CPPO) subay sa hangyo ni Cebu Provincial Governor Pamela Baricuatro nga mangayo ang probinsiya og breath analyzer units.
Kahinomdoman nga nahimong isyu ang importansya sa breath analyzer sa mga imbestigasyon sa mga aksidente nga maglambigit sa driving under the influence of liquor human sa nahitabong drisgrasya ni Kingston Ralph Cheng, diin nakalas kini human nga gibanggaan ni Sean Andrew Pajarillo, diin base sa mga paunang impormasyon, nasayran nga hubog atong higayona si Pajarillo apan nagnegatibo sa liquor test.
Sunod niana mao ang 20-anyos nga lalaki nga waiter human kini magmaniho nga hubog ug nakalambigit sa usa ka aksidente sa dalan N. Bacalso Avenue, Barangay Lawaan I, pasado alas-7 sa buntag, gahapong adlawa.
Tungod niini, nahimong ehemplo ni Ranches sa pagka-epektibo sa breath analyzer units sa pagkasikop sa usa ka 20 anyos nga motorcycle rider, gumikan kay nasuta man kini nga hubog ang maong 20-anyos, atol sa iyang pagmaneho sa motorsiklo, kay nag positibo siya sa alcohol breath analyzer test.
Gani, gipasabot ni Ranches ang importansya sa pag pahigayon og liquor test ug pag sunod sa mga balaod aron sa pag-promote og safety sa kadalanan, ug malikyan ang mga disgrasya.
