CEBU CITY- Nipagawas og Show Cause Order ang Land Transportation Office Region 7 batok sa drayber sa motorsiklo nga adunay plaka G953JZ human mikatap sa social media ang video nga nagpakita sa iyang delikadong “stunt” samtang nagdagan sa karsada.
Sa pahayag sa LTO-7, klarong makita sa video nga ang drayber nagbuhat og peligroso nga lihok sama sa pag-imitate og “Superman” ug sayop nga paglingkod sa motorsiklo samtang nagmaneho.
Matud sa ahensya, ang maong pamatasan nagbutang sa peligro sa ubang motorista ug pedestrian, ug nagpakita nga dili angay ang drayber nga magkupot og lisensya.
Ang insidente nahitabo sa Transcentral Highway ug nahimong hinungdan sa bangga tali sa duha ka motorsiklo, sumala sa report.
Tungod niini, giakusahan ang drayber og Reckless Driving ubos sa Section 48 sa Republic Act No. 4136 o ang Land Transportation and Traffic Code. Lakip usab sa giatubang nga alegasyon ang posibilidad nga dili na siya angay magpadayon sa pag-angkon og driver’s license.
Gipatawag ang maong drayber nga motungha personal ug mosumite og sinulat nga tubag sa LTO-7 Operations Division sa N. Bacalso Avenue, Cebu City, niadtong Pebrero 16, 2026, alas-2 sa hapon, aron ipakita kon nganong dili siya suspendihon o e-revoked ang iyang lisensya.
Samtang naghulat sa desisyon, gipahibalo sa LTO nga preventively suspended na sulod sa 90 ka adlaw ang driver’s license sa drayber ug gibutang na kini sa alarm status. Gimandoan usab siya nga mosurender dayon sa iyang lisensya.
Mipasidaan ang LTO-7 nga kon mapakyas ang drayber sa pagtungha sa gitakdang petsa ug oras, pagahubaron kini nga waiver sa iyang katungod nga madungog, ug ang kaso pagahukman base sa anaa nga mga rekord.
Nagpahimangno ang LTO-7 sa publiko nga dili himuon nga kalingawan ang karsada, tungod kay ang dalan alang sa luwas ug responsableng pagbiyahe, dili alang sa delikadong eksperimento.
