CEBU – Giawhag ang mga molupyo sa Barangay Don Gregorio Antigua sa lungsod sa Borbon nga likayan ang paglangoy sa suba ug pagpainom sa ilang mga hayop sama sa kanding, baka ug uban pa sa tubig sa sapa.
Kini nga pasidaan ni Barangay Kapitan Margarito Ornopia Jr. sa Don Gregorio Antigua human miputi ang tubig sa suba sa barangay sulod sa labing menos duha ka oras gahapong adlawa Domingo, Agosto 21.
Matod ni Ornopia nga iyang gitambagan ang mga residente nga tumanon ang iyang panawagan hangtod nga mapagawas ang resulta sa pagsulay sa sample sa tubig sa sapa, nga wala pa niya ipadala sa Environmental Management Bureau sa Central Visayas (EMB-7).
Dugang pa, nga iya nang gitanggong ang usa ka residente nga si Elmer Degamo, 29, kinsa giingong maoy responsable sa pagpaputi sa kolor sa tubig sa suba.
