ASTURIAS- Giila isip First-Class Municipality ang lungsod sa Asturias sa kasadpang bahin sa Sugbo base sa Bureau of Local Government Finance – Central Visayas (BLGF-7).
Subay pa sa ilang “unofficial” nga listahan sa mga Local Government Units (LGUs) nga nag-upgrade sa ilang income tax classification sayo ning tuiga.
Ang maong anunsyo gipublikar sa social media account sa Public Information Office sa kagamhanang lungsod sa Asturias.
Kini atol sa Republic Act No. 11964 o ang “Automatic Income Classification of Local Government Units Act” nga usa ka balaod nga nagpasiugda sa local autonomy ug nagtugot sa mga LGUs nga makaamgo sa ilang hingpit nga potensyal sa ekonomiya ug sa pag-ila sa panginahanglan sa pagtino sa pinansyal nga kapabilidad sa usa ka lungsod.
Ang Asturias, maoy usa sa dul-an sa 20 ka LGUs sa Probinsiya sa Sugbo nga gitakdang ideklarar isip first class municipalities.
