CEBU CITY — Naguol si incoming Cebu City Coun. Niña Mabatid sa pag-backout sa mga sakop sa Integrated Bar of the Philippines (IBP) Cebu Chapter alang sa gipahigayon nga free legal counselling sa Capitol Compound.
Kini human nga gikanselar ang sponsorship sa IBP Cebu Chapter gumikan lang sa giingong dili maayong impresyon ngadto sa publiko.
Apan nahinayon ug nahimong malampuson ang libreng serbisyong legal alang sa mga Sugbuanon human nakakuha si Mabatid og laing mga abugado.
Nagtuo si Mabatid nga adunay naghimo og mga storya mahitungod sa pagpakig-alayon sa IBP alang sa legal aid nga giingong adunay kalambigitan sa pagkapulitiko niini.
Matud ni Mabatid, kinsa nga usa ka businesswoman ug kapitan sa Mabolo, nga igo lang nga milikay ang IBP sa kontrobersya aron nga dili makahimo og bati nga impresyon ngadto kaniya.
Sa giluwat nga pamahayag sa IBP Cebu Chapter, kini nagkanayon nga mopahigayon sila og free legal counselling sa laing pang mga adlaw aron makalikay sa kontrobersya.
“We regret to inform you that we have decided to cancel today’s Free Legal Aid organized by the IBP Cebu Chapter. In deference to valid concerns raised by some of our members, the 24th Board has determined that an alternative date can be scheduled at a later time for said legal aid activity under circumstances free from possible judgment or doubt,” sigon pa sa pamahayag sa IBP-Cebu.
Hugot nga gibarugan sa IBP nga dili gayud sagulan og pamulitika ang organisasyon mismo.
