TALISAY CITY-Mabulukong gipasigahan sa kagamhanang dakbayan sa Talisay ang Magical Themed Christmas Tree niini nga nahimutang sa City Hall Grounds kagabii sa adlaw nga Biyernes, Disyembre 6, 2024.
Gipangulohan ang Ceremonial Tree Lighting ni Talisay City Mayor Gerald Anthony “Samsam” Gullas uban sa mga sakop sa konseho sa dakbayan sa Talisay diin highlight niini ang parada sa mga Disney-characters sama nila Mickey Mouse, Minnie Mouse, Donald Duck, ug mga Disney Princesses.
Matod pa ni Mayor Gullas na dalit kani nila sa mga opisyal sa dakbayan ang pagdala sa presensya sa Disneyland Themed Park sa dakbayan isip paghatag og kalipay sa kapaskuhan ilabi na sa mga kabatan-onan.
Ang lagsik nga pasundayag nakadani sa mga tawo nga naghinamhinam nga makasinati sa magical ambiance, kompleto sa makapasilaw nga mga suga ug katingad-an nga mga dekorasyon nga giinspirar sa iconic nga theme park.
Ang kalihokan dali nga nahimong paborito sa laaganan alang sa mga pamilya ug mga bisita, nga nagpakaylap sa kalipay ug kahinam sa tibuok dakbayan sa Talisay niining panahona.
Gawas sa mga dekorasyon kay anaa sab ang presensya sa mga nagkalain-laing food stalls nga makapabusog sa mga bisita ug turista.
Tungod sa dagok sa mga tao, dili mawala ang presensya sa mga kapulisan og mga force multipliers aron pagsiguro sa kaluwasan sa publiko.
