DEVELOPING STORY: Nakasinati og dakong trahedya ang lalawigan sa Sugbo human sa usa ka kusog nga Magnitude 6.9 nga linog nga miigo sa Bogo City kagabii sa alas 9:59 sa Setyembre 30.
Ang linog mitay-og sa daghang bahin sa lalawigan, ug misangpot sa pagkamatay sa 27 ka katawhan, daghang samdan, ug grabeng kadaot sa mga imprastruktura.
Pinakagrabe ang natala sa mga lungsod sa Bogo City ug San Remigio, diin adunay daghang casualties o mga namatay.
Sa Tabuelan, Medellin, ug Talisay, adunay nareport nga mga biktima, samtang sa Daanbantayan, daghan ang naangol, kadaghanan minor injuries.
Nasinati usab og aftershock nga adunay kusog nga Magnitude 2.1 sa alas 2:34 sa kaadlawon, Oktubre 1, nga nagdugang kahadlok sa mga lumulupyo.
Sa mga kadaot sa imprastruktura, adunay 6 ka tulay nga dili na magamit (1 sa Balamban, 1 sa San Remigio, 2 sa Medellin, 2 sa Daanbantayan).
Dugang pa, adunay 1 ka kalsada sa Sibonga ang naputol ug dili na magamit.
Nahugno usab ang 4 ka building, tulo niini sa Bogo City ug apil ang sports complex sa San Remigio.
Usa ka simbahan sa Daanbantayan ang nadaot.
Daghang government buildings ang naapektuhan, sama sa Tabuelan MPS, CSMC Building sa Talisay, ug Daanbantayan MPS, nga nakitaan og mga cracks ug structural damage, gipanglantawan nga mosaka pa ang mao nga ihap.
Sa pagkakaron, gipanglantawan sa mga otoridad nga mosaka pa ang ihap sa fatalities ug injuries sa maong katalagman.
Matud sa mga disaster officials, padayon ang data consolidation, rescue efforts, ug relief operations sa tanang apektadong lugar.
Samtang, ang Bombo Radyo Cebu padayon ang pag-monitor sa kahimtang sa mga lungsod nga grabe ang kadaot.
