CEBU – Naangol ang usa ka magtutudlo sa Dalaguete National High School human kini gikatahong naigo sa uga nga panit sa punoan sa mahogany human sa panaglalis sa iyang bana ug sa nagmotorsiklo sa dalan sa Sitio Cansusi, Barangay Tapon, lungsod sa Dalaguete, habagatang Sugbo pasado alas 4 sa hapon sa Domingo, Hulyo 17, 2022.
Giila sa kapulisan sa Dalaguete Police Station, ang suspek nga si Francisco Sasuman,44, usa ka welder nga lumad nga taga Bacong sa Negros Oriental, apan temporaryong nagpuyo sa maong sitio.
Gidakop dayon si Sasuman sanglit didto pa kini sa maong dapit dihang naabot ang mga kapulisan.
Giingong anaa sa impluwensya sa ilimnong makahubog ang suspek dihang nahitabo ang insidente.
Dugang pa, nga nasuko ang suspek dihang ang gisakyang motorsiklo hapit na mabangga sa gisakyan sa biktima nga si Jennifer Andrade ug sa iyang bana, ug ang suspek nipasangil nga ang bana ni Jennifer nga maoy nagmaniho sa van, gituyo nga mipaandar sa brake hinungdan nga hapit nila madasmagan ang van gikan sa luyo.
Sa tunga-tunga sa panaglalis, ang suspek mipunit og uga nga panit sa punoan sa mahogany nga iyang nakit-an daplin sa dalan, ug gigamit kini sa pag-igo sa drayber sulod sa van apan naigo ug nasamdan ang magtutudlo.
Gituyo ni Andrade nga pormal nga mopasaka og reklamo batok sa suspek.
Samtang ang suspek nga si Sasuman pabiling anaa sa detention facility sa nasangpit nga istasyon.
