Gikompirmar sa eksperto sa infectious disease nga si Dr. Rontgene Solante nga natala usab dinhi sa Pilipinas ang makamatay nga bacterial infection streptococcal toxic shock syndrome o kon STSS nga kaylap karon sa nasud sa Japan.
Matod ni Dr. Solante, ang sakit tungod sa komon nga bakterya nga mao’y hinungdan sa pharyngitis o paghubag sa pharynx apan mahimong moresulta sa dili kasagaran ug seryoso nga komplikasyon kung kini mokaylap sa agianan sa dugo.
Gipasabot pa sa eksperto nga ang maong impeksyon magsugod sa panit nga adunay samad diin musulod ang kagaw ug mopaingon sa dugo nga makaapekto sa tibuok sistema sa lawas, mao nga matod niya grabe ang maong bacteria nga dali kaayong mokatap sa lawas.
Dugang pa ni Solante nga aduna kini 30% mortality rate nga nagpasabot nga ang usa ka infected nga indibidwal mahimong mamatay sulod sa 24 ka oras human magsugod ang mga sintomas.
Pipila sa mga sintomas niini mao ang hilanat, sakit sa lawas, kakapoy, pagsuka ug pag-itom sa samad nga mahimong mosangpot sa ubos nga presyon sa dugo ug kalisud sa pagginhawa.
Ang mga indibidwal nga adunay huyang nga immune system lakip na ang mga tiguwang ug kadtong adunay diabetes ug lchronic renal failure ang sagad nga maapektuhan.
Basi sa clinical experience, gitataw ni Dr.Solante nga pipila lang ka kaso sa maong sindrom ang na-detect sa nasud samtang sa Japan niabot kini og 900 ngadto sa 1,000 tungod kay dali kining mikatap.
Kalabot niini, gitambagan sa eksperto ang publiko nga magsul-ob og face mask ug hugasan og maayo ang mga samad samtang kadtong makasinati og sintomas sa maong sakit kinahanglang mokonsulta sa doktor aron matambalan.
